قصيدة الغربة للشاعر كاظم اسماعيل الكاطع

الشاعر كاظم اسماعيل الكاطع

إللي إمضيٌع ذهب
بالغربه شِفتْ التَعب وإتعلٌمت معناه
وإتعلٌمت عالسهر .. والسكته .. والصفناه
ذلٌيت ذلْ النهر من ينكَطع مجراه
وإعرفت كل شي إعرفت
حتىٌ النخل ينحني الريح السفر من يجي
وجايب غريب إوياه
ألله !! يا هالوطن شمسٌوي بيٌه ألله
نيرانه مثل الثلج
كلما تدكَ عالضلع
أبرد وكَول إشٌاه
إللٌي إمضيٌع ذهب!!
بسوكَ الذهب يلكَــــــاه
وإللي مفاركَ محب ...
يمكن سنه وينســــــاه
.. والطاح منٌه الكَلب
قلب إصطناعي إنلكًه ويشكٌلونه إهنـــاه
بس إل مضيٌع وطــــــــــــــن
وين الوطن يلكَـــــــاه ؟ ؟ ؟
* * *
آه ياوطن يا خبز يالشارتك تكتل !!
آه يا وطن يا طفل .. هِنياله منْ صاغ إلك نبض الكَلب جنجل !!
يا وطن .. زٌفة كَمر
ياعراق زَفة كَمر
ونجوم إله إتهلهلْ !!
عذبٌني ما عذبٌك ..
إكتلتني ما أكتلك ..
طبع اليحب ينكتل موش اليحب يكتل
***
آه يا وطن يا جَذِر !!
والجذر هم بيه طبع ..
لو مات من العطش للوادي ماينزل !!
علٌمني إل فراق
أعزف لحن غربتي إبقيثارة أشواقْ
أسهر \ وحن\ وأنفعل
وأتمنىٌ واشتاق
مامش مثل ديرتي
لو نمشي طول العمر !!!
مانلكًه مثل إعراقنا إعراق!

قصيدة لليل المحطة للشاعر كاظم اسماعيل الكاطع

الشاعر كاظم اسماعيل الكاطع

ليل المحطة
بانتظارك خلٌصت عمري إنتظار
عاشرت ليل المحطه
وارتجي إيجيبك قطار
والقطار !!
لو يحب مثلي .. وتشب بضلوعه نار
يسرع إبمشيه ويجيبك
بالفجر قبل النهـــــــــــار
ولَو تعٌبني إنتظارك !!
شارك العمر إبسنينـــــــه
إهواي كًالو مايجيك !!
وكًلبي جاوبهم يجينه .. يجينــــه
ناشدت كل روجه عنٌك ؟؟
كل جرف كحَلت عينـــــه
وإسألت كل الشواطي ؟؟
بلكت إتجيبك سفينـــــه
!!!! ولا سفينه ... ولا قطــــار
وخَلصٌتْ عمري إنتظــــــار !!
لا قطار ولا سفينـــــــه
وآنه والليل إبأمل جَيْتَكْ علينــــــــــــــــه
طيح يا دمع النده وكًطٌر بِدِينــــه
إحنه ليليٌه إنتلاكًه
نسهر آنه وياك ياليل المدينــــــه
آنه عيني عالمحطه
وإنته عينك عالنهار
خلصٌت عمري إنتظـــــــار

قصيده مامرتاح للشاعر كاظم اسماعيل الكاطع

الشاعر كاظم اسماعيل الكاطع

ما مرتاح .. ما مرتاح .. مامرتاح
عيوني تستحي بس الدموع إوكاح
ما مرتـــــــــاح
منٌك.. منٌي .. من الجاي من الراح
ما مرتــــــــاح
عركه وي الزمن ورجعنه مكسورين !!
وبعيده المسافه وينٌسي اللٌي طاح ..
ما مرتـــــــــــــاح
لأن شفت الشمس نزلت تبوس الكًاع
وبكف الطفل تنلاح
ولأن قاضي البلابل مدٌد التوقيف
ومفتوحه السِما
والفيل عنده جناح
ما مرتـــــــــــــــاح
لأن قفل المحبه إنباكً
وِترهٌم عليه مفتاح
ما مرتــاح
متروك بجزيره وتيٌهت بالليل
وإجو ربعي عليٌه بقافلة أشباح
وإنته إشبيك ؟؟؟؟؟
لمٌن دافعت عن نفسي صابك غيض
مو حتى الكًنافذ من تحس بالخوف
تستخدم جلدها سلاح !!
ولا جن الفجر مثل الفجر محبوب
لون الفجر صاير يقبض الأرواح !!
ما مرتـاح من ربعي ولا مرتاح
تمساح إبنهرهم صاحو من الخوف
وجازفت بحياتي من سمعت إصياح
!!! صارعت المنيٌه وبيده هزني الموت!!!
ومدمٌى إطلعت :-
صفٌكًو للتمســــــــاح
كل هذا وتريد أرتاح
ما مرتـــــــــــــــاح
ما مرتاح من ربعي ولا مرتاح
نادوونـي.. وركضت إبليــل
إيد الرسن بيها وإييد بيها سلاح
عثرت مهرتي ... وربعي قبل ما طيــح
واحد كًال للثاني
أبشـــــرك طـــــاح
أبشــــــــرك طــــــــاح

قصيده مرة مرة للشاعر كاظم اسماعيل الكاطع

الشاعر كاظم اسماعيل الكاطع

مُره مُرَه عِشرتي وياك مُرَه
ومن أريد أنساك يمنعني الكًلب
ويذبله حســـــــــره
ومن أريد أنساك , يعرضلي الدرب
ويكًلي إلك خطوات
ذكــــــــــــــرى
ومن أريد أنساك تذكرني الملامه
وشنهي ربحي وياك
واللي مادروا كًالو
تخســـــــــــــره
آنه شنهي الماخسرته وحتُى أخسره ؟
ويانهر يعتب عليٌه ... ؟؟
حتى بجناح الكًصب روجات أعبره ..
وياجبل يصعب عليك حتى أذب حبال روحي
إكًصايب أعلى جتاف صخره
وياعظم تتصوٌره إلتمْ !!
حتٌى يم بابك عشر كسرات
أكســـــــــره
مُرَه .. مُره
والمراره إتزيد لليمشي إبجزيره
ومالكًه وسادة محبه إتريح
ظهـــــــــــره
والمراره إتزيد للمايلكًه ظِلْ
وينتجي إعله الشيب عُمرَه!!
ويا جمرتي الماطفَتْ
حَسٌبت يطفيها دمعي
ثاري دمعاتي إعله خد النار شذره!!
إنته من دكًيت بابي
جبت وياك الحزن خطار ماين
والفرح طلٌعته برٌه!!
آنه من شكًيت زيجي إحتركَت إيدي
وانته من شكًيت زيجك شفنه كًمره...
كان عمري نهر صافي
ومايه غافي
وخنجرك مثل البلم بالليل طرٌه !!
ويانهر والحسره حسره
كون أشوفن سندبادك
شايل إعله إجتافه جزره
بكًلبي حسره...
كون أذب ثوب الحزن وآنه بشبابي
والحزن عالخد أســـــطره..
هيٌه حسره وأمنيه\ نسميها فكره
كون أشوفن سندبادك
شايل إعله أكتافه جُـــــــزْرَه
كون أشوفن مريمَك ما بيها لولـــه
ومن صِدِك نلكًاها عَــــــذرَه !!
هيــٌه حسره .. وعشره مُـــرٌه
والمراره إتزيــد للمايلكًه فـَـيْ
وينتجي إعله الشيب عمـــــــره

قصيده زعلان للشاعر كاظم اسماعيل الكاطع

                                                               الشاعر كاظم اسماعيل الكاطع

                                                

زَعلانْ بَسْ يا زَعَلْ
لمٌن تِرِد للصِدِكً
قبل المنادي أجي ... وشلون جيٌه
أجي
أركض ركض محتركً
ياللذتك إبمهجتي . . وين ألكًـه
مثلك هوى
لولاك والله أختنكً
هيٌه شراكة نِفَس لو سكت
كًلبك سكت كًلبي
ويـِدِكَ لــو يـِدِكَ
لوما وكتنه صعُب ماجان أبد
نفتركً
كِلمَنْ مِشه إل حالته
واحد سِكنْ بالغَرٌب .. واحد سِكن
ْبالشرِكً
*****
كل هالمَسافَه .. البعد !!
وِسوالفَكْ تنسمِع جٌن إحنه
ًحلك إب حلكً
والله عشكًـنا عشكً
يامن إمكًدٌر عَليْ غيرك فصاله صعب
جم دوب أخيٌط و أشكً
حنيت أنه إل شوفتك
واصبرت بس ما صبر قلبي وصرخ !! راح
أطكً
جاباني إلك وإذعنت . . جيتك
بليلة شتا
ظلمه ومطرها رَشكً
وشبعده صار الدرب
خوف ..
و رعيـــد
وثلـــــــج
وجفوف إديـــٌه زركً
إبابك طحت ها كمت
ضَمٌيت إدَيٌـــه إوْ رِدِتْ
عالباب بالروح أدكً
بس كالو إلمَن تدكً
كلمن مشه إلحالته
واحد سكن بالغرب
واحد سكن بالشـــــركً

بدى العام الدراسي للشاعر كاظم اسماعيل الكاطع

                                                                    الشاعر كاضم اسماعيل الكاطع


  بدى العام الدراسي وبدت الهموم
  وبيتي عالمدارس بابه صاير

     نسيت ...وداعتك جيت اشتري هدوم
     الك ...ومحضر اقلام ودفاتر

مو تسمع قيام ...وليش ماتكَوم؟
ومر اسمك ولا من كَال ...حاضر

الشمس طلعت علينا...مو وكت نوم
وهم عدكم صبح يا اهل المكَابر

وهم عدكم ...ضوه ...وشباچ ...ونجوم
وهم ينطونكم واجب الباچر ؟

الوالد بالوداع يصير مهموم ..
وانا اثنينهن والد وشاعر

خيلك طشرتني وچنت ملموم ...
وصارت طيحتي بين الحوافر

اذا عشرين يوم وما شفت نوم..
شيظل بالحيل بالعشره الاواخر؟

فراش الفاتحه لو شفته ملموم ..
بنص كَلوبنا تلكَى الچوادر

يمنه المصبغه ..ودينه لهدوم
الحزنك مشترينه قماش حاضر

تمنيتك جرح ...كلساع ملچوم
وتبات الليل بشفاف الخناجر

انا يا بوي من ونيت مالوم ..
نزل مني دمع يعمي النواظر

خدودي تعودت تتندى كل يوم ..
وتحب الماي خشبات الكَناطر

لمت الروح بس شفادني اللوم.؟؟
شلحك ؟ وبسفينة الموت عابر؟؟

المنايا عالسطح وعيونها تحوم...
عليك ...ونزلتلك نسر كاسر

ستر الله نغگ بديارنا البوم...
اخذ عين الكَلاده وراح طاير

ديني حلاتك حلو الرسوم..
بلكي انعشگ ، دنيانا مظاهر

اظل كاظم وصبري وياي مكظوم...
لوما هالخشب جوه الاظافر

اهن كاسين بيهن كاس مسموم...
خاف اغلط وبالمسموم اكاسر

بعنه البيت، ريت البيت مهجوم....
وريت اكثر بعد من هالخساير

تحب انت اللعب والگبر ملموم ...
شلون تحملت وشلون صابر؟

وليش من الهوى يابوي محروم ...؟؟
ونسمات الهوى تطيب الخاطر

منهو ؟ الشوفك صورةالمعدوم...؟؟
وليش تعلكَت ياشاب يا قاصر

ما ظنيت زرعي يروح فد يوم ...
وعصافير الحزن تگضي البيادر

من اكتب قصيده تزيد الغيوم...
ومن عيني الدمع يملي الدفاتر

يبقى بهل مطر ياشعر منظوم...
نصاري الحسين وبحر وافر.

وين الصبح للشاعر كاظم اسماعيل الكاطع

                                                                  الشاعر كاظم اسماعيل الكاطع

وين صبّح؟-
-مدري والله..بليل مظلم فاركيته
-وين مسّه..؟!
-من طلع ماسد وراه الباب
لكن بالدرب هم بمشيته
-دوره..؟
-كَتلك مالكَيته
-شوف كَلبك..؟
-جان كَبل سنين بييته
-شوف صدرك؟
-يكره المصدور ريته..
-شوف ضلعك؟
-مثل عود العنب يابس
وايست منه وطويته
-دوره؟؟
-كَتلك ..مالكَيته
-ليش عفته؟؟..
-اعطشت مره وماسكَاني..
وعطش مره ومارويته
-شوف صندوك الاسرار
-بدون رزه
وكل حجي البيهن حجيته..
-شوف عينك؟
-ماكو بيها..
-شوف عينك؟!
جان بعيوني وبجيته.
.

زين ماشافو النار
وفطنوا السلة متاعك
زين ماشافو ادموعي
جالكَو بحر الدمع تابع اشراعك
زين ماشافوا ازنودي
جالكَو شبكَة وداعك
زين محد منهم أشتم
ريحة البوسة اعله خدي
وعالصدر دفو المكان البي
اذراعك
اسهر بفنجان فارغ
واكلب الروح اعله نارك
بسمك وطشيت حرمل
وزوكت خدي بشرارك
جنت مافطن الحسنك
لجن بّينلي البعد
كل الجمال بسد سمارك
ليش؟؟
وانت بعيد احبك
ومن جنت وياي
كل ساعة انتعارك!!

حياة كاضم اسماعيل الكاطع

                                                 الشاعر المبدع والراحل كاظم اسماعيل الكاطع



شاعر شعبي عراقي. يعد واحدًا من ثلاث أعمدة للشعر الشعبي في العراق وهم مظفر النواب، عريان السيد خلف وكاظم إسماعيل
الكاطع.
كاظم إسماعيل الكاطع يعود بجذوره إلى محافظة ميسان في العراق من مواليد 1950 م في بغداد. خريج الجامعة المستنصرية/كلية الاداب/ قسم اللغة الإنكليزية1974 م. يحمل شهادة الماجستير في الأدب الإنكليزي من إحدى الجامعات الهندية. عضو جمعية المؤلفين والموسيقين العالميين(باريس) عضو الاتحاد العام للشعراء الشعبيين في العراق ورئيسه في دورتين انتخابييتين عام 1993 و 1994.^[1]

شعره

تعود بداياته الشعرية إلى الستينيات. بداياته كانت في مدينة الثورة حيث كتب أول قصيدة له كانت قصيدة بعنوان(انتهينه) وهي عبارة عن قصيدة لشاب خابت آماله في الحب. وتقول مقاطع القصيدة: وانتهينا وانتهى الماينتهي وخلص حجينة وانتهينا وبقت كطرات الوفى المذبوح تتناثر علينا. وبقيت للمجفين كوم اسرار عد روحي الامينة وكون ندري بالعتاب يفيد بيهم عاتبينا وكون يسوون البجي..جا باثنعش ناظر بجينا غافلونا وباكو العشرة غفل من بين ادينة. وباكوا من ايد العمر سنتين وبوجهم رضينة تالي نزعوا شوكنا من كلوبهم وكالوا عوض عنكم لكينا. إلى أخر القصيدة... ويقول عن هذه القصيدة أنه كتبها بعفوية لحبيبته حينما كان يمارس وقتها لعبة كرة القدم في منتخب الشرطة.^[2]
القصيدة جعلته ينضم إلى ركب الشعراء المعروفين وقتها ومنهم جمعة الحلفي ,عريان السيد خلف وفالح حسون الدراجي وأبو سرحان وكريم العراقي وشاكر السماوي بعد أن دأب على التردد على مقهى الميثاق في مدينة الثورة وبدأ التعرف على شعراء جيله هناك. وقد تأثر بصديقه شاكر السماوي
صدر ديوانه الأول عام 1968 وعنوانه (قصائد دامعة).. وللكاطع نفس مميز في الشعر باستعماله اللغة العامية الدارجة وابتعاده عن (الحسجة).